Rianxo vai homenaxear este venres 27 de outubro ao poeta Manuel María Fernández Teijeiro, popular e comunmente coñecido como Manuel María. Trátase dun acto organizado por Galiza Nova A Barbanza coa colaboración do Concello de Rianxo, o BNG de Rianxo e a Casa Museo de Manuel María. Contarase coa presenza de Alberte Ansede (presidente da Fundación Manuel María) e de José Antonio González Vilariño e Yolanda Tarrío Fernández, que farán, ámbolos dous, de condutores da homenaxe ao poeta da Terra Chá. A cita dará comezo ás 20.00 horas no salón de actos do Auditorio de Rianxo.
Manuel María Fernández Teixeiro, nado en Outeiro de Rei o 6 de outubro de 1929 e finado na Coruña o 8 de setembro de 2004, foi un poeta, narrador, dramaturgo e académico da lingua galega, de marcado compromiso político e cultural.
Entre as súas obras destacan: Muiñeiro de brétemas (1950), o primeiro poemario dun poeta da nova xeración; Morrendo a cada intre (1952), Terra Chá (1954), unha homenaxe á súa terra natal onde a paisaxe é o protagonista; Libro de pregos (1962), Barriga verde (1968), Poemas ao outono (1977), Catavento de neutrós domesticados (1979), ou Compendio de orballos e incertezas (1991), entre outros.
Entre os temas dos seus poemas destacan o amor, a arte, o propio compromiso político, a denuncia de eivas, a etnografía, a física, a historia, a inmaterialidade, a mitoloxía, o mundo animal, a palabra poética, o paso do tempo, a relixión, a sociedade, a lingua, os traballos agrarios, o urbanismo ou a xeografía.
Dedicóuselle o Día das Letras Galegas de 2016.
