Rianxo vai acoller este 12 de outubro a terceira edición da Andaina Solidaria ASANOG (Asociación de Axuda a Nenos Oncolóxicos de Galicia), coa colaboración do Concello e co obxectivo de recadar fondos para a asociación, á que irá o 100% do recadado a través das inscricións.
Adrián Mosquera, o primeiro deportista olímpico rianxeiro,volverá ser o padriño da proba.
A andaina desenvolverase o xoves 12 de outubro, a partir das 10:30 horas e pódese escoller entre dous percorridos de moi baixa dificultade (4 e 11 quilómetros) para facilitar a participación e colaboración con ASANOG. Tamén é posíbel colaborar coa entidade a través da Fila Cero (0), que estará dispoñíbel na páxina web das inscricións. Estas xa están abertas (a través de Emesports ou presencialmente no Servizo de Deportes de Rianxo ou na praza Castelao até 15 minutos antes do inicio da proba) e rematan o luns 9 de outubro de 2023 ás 23:59 h. O límite de prazas é de 750 participantes.
