O Concello de Dodro, en colaboración da Deputación da Coruña, organiza este sábado 28 de outubro unha xornada de plogging a disposición de residentes e visitantes. Trátase dunha xeira deportiva, saudábel e sustentábel na que se convida ás persoas participantes a exercitarse ao tempo que recollen residuos da natureza: plásticos, briks, latas, botellas, etc.
Segundo informa o Concello de Dodro, “trátase dunha práctica que comezou en Suecia hai uns anos e foi estendendo por outros países, incluíndo rutas de sendeirismo por parellas combinadas coa recollida de refugallos e con premios a quen máis lixo apañe”, sendo este o formato elixido para a xeira ambiental deste sábado en Dodro, que ten, segundo informan dende o Concello, a gran vantaxe de ofrecer dúas propostas nunha única xornada: exercicio e ecoloxía nun só día.
Como dixemos, haberá trofeos para as parellas que máis cantidade de plásticos, latas e briks apañen e, tamén, para as que máis quilómetros percorran.
Quen precise máis información pode poñerse en contacto co Concello (Departamento de Deportes, a través do teléfono 981 802 532 ou a conta de correo deportes@dodro.gal).
