Máis de 140 nadadores nacionais e estranxeiros participarán na proba de ultrafondo a Tripla Coroa Illas Atlánticas, que se disputará o vindeiro sábado 9 de setembro entre a illa de Sálvora e Ribeira, pasando polo Areoso, ao norte da illa de Arousa, cun percorrido de 19 quilómetros. Segundo se fixo saber na presentación oficial do evento (este luns 4 de setembro en Ribeira) “trátase dunha das probas de natación máis duras e esixentes de España, que celebra este ano a segunda travesía da súa terceira edición na ría de Arousa”. Disputarase ata 2024 con tres probas de longa distancia e un total de 57 quilómetros en tres anos.
Asistiron á presentación a directora xeral de Patrimonio Natural, Belén María do Campo Piñeiro; o concelleiro de Deportes de Ribeira, Xabier Vidal; o director da zona Barbanza de Abanca, Jesús Soto; a xerente de comunicación de Coca-Cola Europacific Partners na zona Norte, María Troncoso Calvo; o
presidente da Asociación de Empresarios de Ribeira, Francisco Martínez Gude; o xerente da división náutica de Náutica A Poutada, Fernando Pérez Sobrido; o director de Arraianos Produccións, Aser Álvarez; Jesús Collazo, en representación do concesionario de automóbiles Suzuka Móbil; o responsábel de comunicación da Asociación Amicos, Gabriel Rodríguez Villar, con dous usuarios do centro, Adriana Miguens e Manuel Prado, e a directora de organización da proba, Beatriz Alvariño Díaz del Río.
Durante a presentación, Beatriz Alvariño destacou “o gran interese que espertou a proba”, que é a primeira vez que ten a súa chegada en Ribeira e a terceira que se disputa na ría de Arousa, tralas celebradas en 2017 e 2019. Ademais, resaltou “a espectacularidade do percorrido”, pasando polos Xidoiros (Areoso e Pedregoso) e a illa da Rúa, e a chegada na praia de Coroso, así como a dificultade e a dureza da travesía, principalmente os oito primeiros quilómetros xa neles as e os participantes terán que enfrontarse ás correntes, á ondada e á dureza do mar aberto.
Alvariño agradeceu o apoio do Concello de Ribeira e a agrupación de voluntarios do servizo municipal de Protección Civil de Ribeira, así como dos patrocinadores, Xunta de Galicia, concretamente a Consellería de Medio Ambiente, Territorio e Vivenda, a Deputación de Pontevedra, Abanca, a Autoridade Portuaria de Vilagarcía, a Mancomunidade do Salnés, a Conservas Ignacio González Montes, a Suzuka Móbil, Gadis, Zoggs, M Q España, Arraianos Produccións e ao Cámping Coroso, así como de todos os colaboradores e voluntarios.
Segundo engadiu, do total de participantes (141), 127 son homes e 14 mulleres con idades comprendidas entre os 20 e 65 anos, procedentes de 14 Comunidades Autónomas: Galicia (38), Castela-A Mancha (4), Madrid (6), Cantabria (1), Asturias (12), Euskadi (11), Castela-León (5), Comunidade Valenciana (13), Navarra (2), Estremadura (4), Aragón (6), Cataluña (8), Andalucía (4), Illas Canarias (14), e tamén de Portugal (3), Andorra (2), Francia (1), Arxentina (1) e Cuba (1).
Estarán presentes 67 clubs nacionais e estranxeiros representados na proba. O nadador máis novo é o asturiano Diego Gutiérrez López (20 anos) e o máis veterano, o vigués Alejandro Ros Rosillo (65 anos). Ademais, procedente de Arxentina participará Guillermo Silva Fiorenza, na que será a súa terceira participación na Tripla Coroa Illas Atlánticas.
Dos 139 nadadores que finalizaron a súa primeira coroa en 2022 entre as illas Cíes e Baiona de 15 quilómetros na ría de Vigo, un total de 119 buscan conseguir a súa segunda coroa na ría de Arousa. Ademais, 8 nadadores (7 homes e 1 muller) aspiran a completar a súa terceira edición en 2024. Entre os participantes, hai 10 rexistrados (8 homes e 2 mulleres), que nadarán sen neopreno. Entre eles, o alacantino Jorge Crivillés Villanueva, que completou a proba que cruza a canle de Bristol converténdose no primeiro español e quinto deportista do mundo en obter a Tripla Coroa de natación de longa distancia, ao sumala ás súas travesías da canle da Mancha (2012) e a canle do Norte (2019).
Todos os nadadores levarán boia de seguridade e un dispositivo de xeolocalización para o seu seguimento a través de www.tracktherace.com. As clasificacións poderán consultarse na páxina web www.championchipnorte.com.
A clasificación provisional absoluta na categoría masculina está encabezada polo canario de Arrecife, pertencente ao club de natación Vulcania, Aldo Román Gutiérrez Llanos (03.56:37), seguido por 9 segundos do estremeño Cayetano Muñoz Labrador (03.56:46) e a 10 segundos do catalán Sergio Torres Serrano (03.56:47).
Na categoría provisional absoluta de mulleres, encabeza a clasificación a asturiana Patricia Agüera Fernández (04.20:10), seguida da aragonesa Tania Fuentes Cihuela (04.30:09) e a valenciana Esperanza Navarro Simón (04.58:06).O asturiano Luís Bárcena Pérez encabeza a clasificación provisional masculina na categoría sen neopreno, seguido do nadador cubano Alexis Rodríguez Castedo e o alacantino Jorge Crivillés Villanueva.
Na categoría feminina sen neopreno, a primeira clasificada provisional é a viguesa Vanesa Rodríguez Pérez, seguida da vasca Agurtzane Domingo Inhiesto (é a única muller que completou dúas edicións da Tripla Coroa Illas Atlánticas). Ademais, só hai dúas nadadoras que participarán sen neopreno.
Durante a travesía despregarase un forte dispositivo de seguridade integrado por 26 embarcacións, 42 kayakistas, dous médicos, máis 20 socorristas, técnicos en emerxencias sanitarias e enfermeiros, unha ambulancia medicalizada en meta e preto de 200 persoas en terra e mar, que estarán coordinadas por Carlos Agra, contramaestre do Real Club Náutico de Sanxenxo.
Ademais, haberá un posto de Protección Civil de Ribeira na chegada. Para velar pola seguridade dos nadadores, a organización contará coa colaboración do Club Náutico de Ribeira, Gardacostas de Galicia, Gardia Civil do Mar, Asociación Procura e Salvamento de Galicia, Escola Naval Militar de Marín, as confrarías de Pescadores de Ribeira e A Illa de Arousa, a agrupación de voluntarios e servizo municipal de Protección Civil de Ribeira, Protección de Civil da Pobra do Caramiñal e Rianxo, o Servizo de Emerxencias do Grove, Nauta Sanxenxo, a asociación de voluntarios Vodea, o Parque Nacional das Illas Atlánticas de Galicia, o Club de Piragüismo Rías Baixas de Boiro e Club PescaCíes.
Alvariño lembrou que os nadadores terán un límite para realizar a proba de sete horas e media. A organización contará con 200 mantas térmicas, 1.300 augas, 750 Powerade, 400 pezas de froita, máis de 600 xeles e barriñas enerxéticas e 40 litros de chocolate. Así mesmo, máis de 100 familiares e acompañantes participarán nas distintas actividades paralelas que se celebrarán durante a fin de semana.
De acordo cos plans da organización, a saída darase ás 08.45 horas na praia da Almacén, na illa de Sálvora, coa saída do primeiro grupo (máis lento) integrado por 37 nadadores. O segundo, con 47 nadadores, farao ás 09.05 horas; o terceiro con 27, ás 09.25 horas. O cuarto, con 22 nadadores, sairá ás 09.50 horas e, o último, o máis rápido formado por 8 nadadores, tomará a saída ás 10.05 horas. Desde aí os nadadores dirixiranse cara ao quilómetro 4, onde estará fondeado o primeiro barco de avituallamento da travesía de Náutica A Poutada. Aquí os nadadores poderán repoñer forzas con bebidas e comida (plátanos, barriñas enerxéticas e xeles).
O segundo barco de avituallamento, tamén de Náutica A Poutada, estará situado no quilómetro 8, despois da baliza de Esqueiros, e, o terceiro, no quilómetro 12, enfronte ao illote Areoso, ao norte da illa de Arousa. A partir de aquí, a proba comezará a ser competitiva e cada nadador poderá marcar o seu propio ritmo de nado ata meta.No quilómetro 16, en fronte á Illa da Rúa, estará o cuarto avituallamento e único control de paso. A partir de aquí, quedarán 3 quilómetros ata a met
situada na praia de Coroso, en fronte ao Centro de Deportes de Raqueta, en Ribeira.
Calcúlase que o primeiro nadador en chegar á meta culminará a proba en catro horas e media (hora aproximada de chegada do primeiro nadador: 15.00 horas), pero estímase tamén que o resto de participantes poidan prolongar o seu esforzo durante tres horas máis.
No caso das que as condicións meteorolóxicas sexan adversas e non se puidese saír desde a illa de Sálvora, a organización ten previsto un percorrido alternativo de 17 km con saída e chegada na praia de Coroso, pasando polo illote Areoso.
Actividades paralelas
De xeito paralelo á travesía celebraranse diversas actividades para os familiares e acompañantes, entre as que se inclúe unha visita guiada á illa de Sálvora, en colaboración co Parque Nacional dás Illas Atlánticas de Galicia, na que participarán preto de 50 persoas e cunha duración de máis de dúas horas.
Amais, organizarase un concurso de fotografía para escoller as tres mellores imaxes que representen a Sálvora, que serán premiadas con varios agasallos. Ao finalizar, realizarase unha limpeza da praia da Almacén.
Ademais, o Concello de Ribeira, a través da Concellería de Turismo, impulsará unha visita guiada gratuíta para os nadadores e acompañantes a dous dos enclaves turísticos máis importantes de Ribeira: o miradoiro de Pedra da Ra e o Castro dá Cidá. A visita celebrarase o sábado 9 de setembro entre as 18.30 e 19.45 horas, e participarán preto de 30 persoas.
Entrega de premios
Ao finalizar a travesía, os nadadores e acompañantes participarán na entrega de premios e unha cea con produtos con denominación de orixe galega no Camping Coroso, en Ribeira, coa colaboración da Consellería do Mar. En total entregaranse premios aos tres primeiros clasificados da categoría masculina e feminina absoluta e sen neopreno, así como distincións aos nadadores que logren finalizar a proba nun acto que terá lugar o sábado a partir das 20.30 horas.
Os tres gañadores absolutos da proba, tanto en categoría masculina e feminina, recibirán unha figura da serea de Sálvora, elaborada pola Asociación de Familias de Persoas con Discapacidade Psíquica (Amicos), de Boiro. Así mesmo, aos nadadores que logren finalizar a proba entregaráselles unha placa e diploma da súa segunda coroa.
O perfil medio do nadador é o dun experimentado deportista que está afeito nadar travesías de longa distancia (máis de 10 km), e que conta “cun excelente estado físico e forza mental para afrontar un reto destas características”. Vento en contra, correntes, ondada, baixas temperaturas na auga e a dureza do océano aberto serán algúns dos elementos adversos aos que terán que enfrontarse os participantes na travesía.
A Tripla Coroa Illas Atlánticas, 57km a nado, consta de tres probas de natación de 15, 19 e 23 km de distancia, que se celebran nas rías de Vigo, Arousa e Pontevedra, entre 2022 e 2024. Cada unha das tres travesías sae dunha illa do Parque Nacional: Cíes, Sálvora e Ons, respectivamente.
A primeira das tres probas, de 15 km, celebrouse entre as illas Cíes e Baiona en 2022. A segundo será este sábado entre a illa de Sálvora e Ribeira, con 19 km de percorrido. A última, a máis longa con 23 km, arrincará da illa de Ons e terminará en Combarro, pasando pola illa de Tambo en 2024.
Os obxectivos deste reto son “poñer en valor a riqueza natural das Illas Atlánticas, promocionar Galicia no exterior e converter este desafío deportivo nunha das probas de natación de referencia en España e Europa”.
A travesía a nado entre a illa de Sálvora e Ribeira conta co patrocinio da Xunta de Galicia, a través da Consellería de Medio Ambiente, Vivenda e Territorio, Concello de Ribeira, Deputación de Pontevedra, Abanca, Zoggs, Gadis, M Q España, Suzuka Móbil, Conservas Ignacio González Montes, Mancomunidade do Salnés, Autoridade Portuaria de Vilagarcía, Arraianos Produccións e Cámping Coroso.
Ademais, colaboran o Parque Nacional dás Illas Atlánticas de Galicia, a Asociación de Empresarios de Ribeira, Coca-Cola, Iberia, Froiz, Piratas de Nabia, Gardacostas de Galicia, Club Náutico de Ribeira, confrarías de pescadores da illa de Arousa e Ribeira, Náutico A Poutada, Adegas Valmiñor, Editorial Belagua, Hotel Norat Palmeira, ANFACO-CECOPESCA, Confeitería Dominga de Ribeira e Clubnatacion.com, entre outros.
