A marea de solidariedade de Aguiño, Ribeira e Barbanza arredor do establecemento hostaleiro (O Chirin Rebalo) que ardeu a finais de xullo a carón do Campo de Fútbol da Tasca, en Aguiño, veu este mes de agosto con forza. O obxectivo: recadar fondos para axudar á súa reconstrución. Baixo este reto común, o pasado domingo celebrouse un festival solidario no mesmo emprazamento no que participaron centos de persoas e que tivo como especiais protagonistas ás tres integrantes do grupo de pandereteiras Tanxugueiras, unha das cales, Aida Tarrío Torrado, é natural (precisamente) de Aguiño. O grupo foi a gran sorpresa dun festival solidario que contou tamén coas actuacións de Doctor Migraña & The Speedyfriends, Amores de Barra e o dúo noiés Monoulious Dop. O certame benéfico contou co apoio do Concello de Ribeira. O propietario do local achegou nas redes sociais unha emocionada mensaxe de agradecemento polo apoio recibido:
“Parece mentira que en menos dun mes tivera dous domingos tan diferentes. Os dous sen durmir, claro, pero que distintos. O 30 de xullo 2023 todo parecía que desaparecía entre as lapas, tanto esforzo realizado durante estes anos quedaba feito cenizas e me parecía tan irreal e inxusto. En cambio 20 de agosto 2023 todo esforzo parecía recompensado toda esa xente que de maneira altruísta se xuntou no O CHirin Rebalo para demostrarme que o traballo realizado valerá mais que a pena, darme tanto apoio ánimo e mostras de cariño. Moitisimas Gracias”.
