Comedia, música, espectáculos, narración oral… O Verán Cultural da Pobra do Caramiñal traduciuse nun total de catorce actividades de balde coas cales desfrutar nos meses de xullo e agosto. Esta ampla e variada axenda organizada pola Concellaría da Cultura en colaboración coa Rede Cultural da Deputación da Coruña e a Xunta leva nesta semana ao Cantón da Leña dúas novas funcións. Chégase así á recta final dunha programación que a concelleira da Cultura, Patricia Lojo, enxalza por permitir cada verán seguir empapándose de cultura, ademais de apoiar as numerosas compañías e axentes dinamizadores neste ámbito.
Simplemente Enricco porá en escena Heinrich: aprendiz de mago no día 8, ás 20.30 horas, onde o pintoresco personaxe realizará incribles xogos malabares e arriscados equilibrios.
Nelson Quinteiro Producións abordará contos populares dende un punto de vista moito máis cómico e actual en Pequeno cabaré infantil, no día 10, ás 20.30 horas, cun ritmo frenético, interacción, sorpresas, cancións, coreografías e unha escenografía moi especial.
E a actividade prevista para o día 11 con El TomaSON e a súa demostración A Pobra baila! adíase. A nova data e lugar comunicarase proximamente.
