O Club de Xadrez Rianxo está a disputar estes días o Campionato de España por Equipos, que se celebra na localidade andaluza de Linares (Jaén) dende o domingo 13 de agosto até o venres 18.
Participan na competición un total de 59 equipos dun nivel medio moi alto, e onde os primeiros equipos da clasificación superan de media os 2.350 puntos ELO.
A entidade deportiva rianxeira participa na Segunda División. Dela ascenden os dous primeiros clasificados para a Primeira División reservada só para oito equipos a nivel nacional.
O club rianxeiro está representado por Fernando Sánchez Aller, Samuel Villar Pérez, Marcial García Carbo, Karem Zapara e Daniel Martínez Dourado.
Este mércores 16 de agosto pola mañá xa se disputaran catro roldas con tres vitorias e unha derrota:
1. A.D. San Viator (Euskadi) – Club Xadrez Rianxo. Resultado: 0-5
2. Club Xadrez Rianxo – Prodomasa Coin (Andalucía) Resultado: 1-4
3. ASSA Enric Valor (Alicante) -Club Xadrez Rianxo. Resultado: 1.5 -3.5
4. Club Xadrez Rianxo – Colón Sabadell Chessy (Cataluña): Resultado: 4.5 – 1.5
O club rianxeiro chegou á quinta xornada e á metade da competición como oitavo na clasificación xeral.
Na xornada deste mércores xogará a partir das 17h contra o Silla Integrans Col-Lectius de Valencia. Poderán seguirse as partidas en directo dende o Facebook do club rianxeiro.
Para participar neste campionato de España contouse cunha subvención da Deputación de A Coruña.