O vindeiro martes 15 de agosto vaise celebrar en augas da ría de Noia unha nova edición (a número XXI) da Travesía Solidaria a Nado entre Testal e O Freixo. Será novamente un evento deportivo pola inclusión, pola solidariedade e a integración. Esta semana foron presentados os detalles da proba no Concello de Noia, de man do presidente de ADECO-DEA local, José Barrio, xunto coa concelleira de Xuventude, Laura Salgado e o concelleiro de deportes, Santi Rodríguez.
Segundo fixeron saber, como cada ano as prazas son limitadas a 100. As persoas que queiran inscribirse aínda están a tempo de facelo (até o venres 11 pola noite) a través de Emesports.es.
Trátase dunha travesía a nado non competitiva, solidaria e reivindicativa co deporte inclusivo – adaptado. A saída está prevista para as 17.30 horas do martes 15 dende o porto de Testal en Noia, até o porto do Freixo na Serra de Outes.
