Xulio Xiz. Os Asteleiros Fra son os máis antigos estaleiros de ribeira de Galicia, tendo máis de dous séculos de existencia, xa que se sabe que en 1806 xa construían barcos para a pesca. Están en San Cibrao, na costa de Lugo, e o seu director é Francisco Fra Rico, pertencente á sétima xeración familiar dedicada á construción artesá de barcos.
Ademais da construción de barcos, realizan tamén un importante labor pedagóxico, organizando visitas guiadas para os interesados en coñecer a carpintería de ribeira, e dan cursos para conseguir informar e formar de maneira que non se perda este oficio tan galego, esencial para a nosa costa e as súas xentes.
Un incendio que se sabe provocado destruíu as instalacións deste estaleiro, e a Familia Fra acode por todos os medios ao seu alcance para intentar conseguir axudas e volver a poñer en funcionamento estas instalacións.
Ata este momento, levan conseguido 11.590 euros, nunha primeira fase da campaña que esperan completar na primeira quincena do mes de setembro, e aínda que a cantidade é só simbólica a efectos da reconstrución, están moi satisfeitos pola resposta dos simpatizantes coa súa iniciativa, agradecen todas as aportacións, e solicitan que se continúe coas axudas por modestas que sexan, xa que todas serán decisivas á hora de conseguir que siga con vida este histórico estaleiro que alguén quixo borrar do mapa, pero o estaleiro e a familia que o sostén non van permitir que morra, coa axuda de toda a xente con boa vontade que queira apoialos.
Á información sobre esta campaña pode accederse en Youtube:https://www.youtube.com/watch?v=Xn7z4fUThXI
