O candidato galeguista a alcaldía de Ribeira anunciou este mércores 12 de Xullo a este medio que deixaba a política activa aludindo a diversos motivos.
Nun comunicado o ata agora líder do PG considera que cos resultados das pasadas municipais se saca a conclusión de que a maioría dos Ribeirenses preferiron optar polas opcións de sempre, sen deixar unha oportunidade a novas alternativas como a nosa, que trataban de mellorar a vida dos veciños e veciñas do noso concello. Tanto o PP como o BNG subiron en case todos os concellos de Galicia debido ao tirón nacional e mediático que tiveron, e aquí non ían ser menos, a pesar do mal que o fixeran, o que nos fai pensar que a xente vota por modas e en rabaño, algo contra o que os partidos pequenos pouco podemos facer.
Moisés Dominguez díe que se presentaron cun programa con propostas para todas as parroquias e que trataba de resolver os problemas principais da cidade, cousa que outros partidos non fixeron, e aínda así obtiveron máis votos ca nos, polo que o programa e as propostas tampouco son algo decisivo.
Na súa carta di que ” poderíamonos presentar mil e unha veces, e as mil e unha veces perderíamos.
A día de hoxe que en Galicia haxa unha cuarta forza política como a nosa, que sexa de centro galeguista e que poida ser chave en distintos gobernos é unha utopía, xa que non hai apoio social, nin financeiro, nin mediático, nin os medios humanos necesarios para poder conformalo e mentres o BNG non sexa capaz de plantarse no centro electoral e mentres non albergue no seu interior a todas as forzas galeguistas da nosa comunidade, como na década dos noventa e dos dous mil, eu creo que os galegos e galegas podemos ir esquecendo a posibilidade de que teñamos en Galicia un partido forte que sexa capaz de sacar amplas maiorías tanto a nivel municipal, como autonómico, como nacional e representar así a unha
gran parte dos galegos que hoxe en día non se ven representados por ningún partido.
Despois destas conclusións e da desesperanza xerada pola falta de apoio por parte da cidadanía nestas eleccións, tomei a decisión persoal de deixar a política activa.
Finalmente quero desexarlle a mellor sorte do mundo ao novo goberno local e darlle as gracias as 278 persoas que nos deron o seu voto de confianza nestas eleccións e trataron de optar por unha alternativa que mellorase o noso concello. Moitas gracias a todos e todas e unha aperta de parte de Moisés Domínguez Rodríguez”.
