A Comisión de Homenaxe a Plácido Betanzos informou de que o vindeiro sábado, día 10 de xuño ás 19:00h, en Palmeira, inaugurará a escultura de homenaxe ao político, profesor e escritor que leva o nome da devandita entidade, falecido en xuño de 2018. Trátase da obra Aperta. Homenaxe á Concordia, da artista noiesa Soledad Penalta, unha das escultoras máis reputadas do Estado español, recoñecida internacionalmente e académica numeraria da Real Academia de Belas Artes entre outros cargos e distincións que se recollen no seu extenso currículo.
A comisión fai unha avance do acto de inauguración e nel, no avance, indícase o seguinte:
“Pasaron xa cinco anos daquel 2 de xuño do 2018, no que quedamos sen a presenza do amigo Plácido. Moitas foron as mostras de afecto , que a súa figura espertou, algunhas das cales se plasmaron en sentidos artigos publicados nos medios en recordo do camarada. Froito dese cariño e recoñecemento, naceu esta comisión, formada por xente de diversos ámbitos, pero cun nexo común, o amor e amizade polo camarada Plácido. Un grupo de amigos e amigas, que nos unimos para que a súa figura e eses valores que atesourou en vida non quedaran esquecidos, e perduraran na nosa memoria. Pero nada poderiamos conseguir se non contásemos coa colaboración de todos os que contribuíron ao éxito do noso empeño. Vaia por diante a nosa sincera gratitude ao alcalde, Manuel Ruiz Rivas, á Corporación municipal, aos partidos políticos que nos apoiaron, á Deputación Provincial, á Mancomunidade Arousa Norte, ás asociacións culturais, así como a todos os amigos e veciñanza que nos animaron e impulsaron na nosa tarefa. Grazas!
Estamos na recta final, e este próximo día 10, esta comisión disolverase, coa doce satisfacción de ter culminado con éxito os nosos obxectivos.
Antes, queremos facervos un chamamento, unha invitación cordial para que xuntos-as compartamos este acto final, da inauguración de Aperta no que intervirán, Unai González, membro da comisión, Pepe A. Castrelo, historiador de Palmeira, Soledad Penalta, artista e creadora da escultura, Sofía Betanzos, filla de Plácido, Maria Carmen García, presidenta da Comisión e Manuel Ruiz Rivas, alcalde de Ribeira en funcións; no que contaremos coa participación dun grupo de música tradicional galega”.
