Esta madrugada do luns un incendio que se iniciou sobre as dúas da madrugada destruíu por completo unha casa situada na rúa Romero Ortiz de Ribeira, propiedade da familia dun dos residentes habituais e considerada un punto de venda de drogas e, tamén, un punto de encontro de drogodependentes locais, moitos dos cales tíñana como residencia habitual. As chamas propagáronse con rapidez por todo o edificio, de dous andares, e mesmo provocaron que o tellado e varias paredes se derrubasen, polo que os bombeiros dos parques de Ribeira e Boiro que se desprazaron ao lugar non puideron chegar a entrar. Nestes momentos aínda se descoñece se había alguén no interior do edificio.
Os bombeiros de Ribeira foron os primeiros en mobilizarse tras recibir unha chamada do 112 ás 2.10 horas. Cando estaban de camiño foron alertados pola Policía Nacional de Ribeira de que o incendio estaba descontrolado e o lume saía xa polas xanelas e o teito do edificio. Ante a probabilidade de que puidese haber alguén no interior, solicitaron a colaboración do persoal do parque de Boiro. Ao momento tamén acudiron axentes da Policía Local.
Os equipos de extinción comprobaron que o o tellado e varias paredes colapsaran e que as chamas eran moi virulentas, polo que se descartaron a posibilidade de entrar. Os bombeiros deron por finalizado o seu traballo ás cinco da madrugada.
A rúa Romero Ortiz atópase cortada por considerarse que existe un alto risco de derrube do edificio afectado polo incendio. Todo indica que permanecerá pechada ao tráfico ata que o inmoble sexa inspeccionado polos técnicos do Concello e determinen os pasos para dar. A vivenda en cuestión foi adquirida polo Concello hai uns meses co fin de demolela para ampliar a rúa Romero Ortiz, xunto coa propiedade lindeira, abandonada dende hai décadas.
R
