A sede da conserveira JEALSA en Bodión (Boiro) recibiu este mércores 10 de maio a visita do presidente da Xunta, Alfonso Rueda, e do conselleiro de Economía, Francisco Conde, que foron recibidos e acompañados polo presidente do grupo, Jesús Manuel Alonso Escurís e máis polo alcalde de Boiro, José Ramón Romero. O titular da Xunta reivindicou a competitividade da industria galega ligada á coxeración, da que dependen máis de 20.000 empregos e da que JEALSA é un exemplo moi destacado.
Neste senso, instou ao Goberno central a que “active medidas para garantir viaibilidade e a competitividade do sector” (que produce electricidade e calor de xeito conxunto), con vistas a asegurarlle un futuro a medio e longo prazo nun contexto de suba de custos pola enerxía (o gas) e de volatilidade do mercado de CO2.
Segundo dixo Rueda, este problema afecta a máis de 80 empresas de sectores estratéxicos para Galicia do eido da madeira, alimentación, papel, refino ou biocombustíbeis, que representan o 25% do PIB industrial e que, dixo, no que vai de ano, experimentaron unha baixada da produción dun 40% de media. “Estas empresas”, dixo, “prevén que, sen un novo marco retributivo estábel para operar, nun par de meses, todas as plantas de coxeración en Galicia verán seriamente comprometido o seu futuro”.
A demanda
Rueda fixo saber, nun plano máis concreto, que estas firmas demandan que sexa o Estado quen adopte medidas que acheguen viabilidade e competitividade ao sector da coxeración e que promova esta tecnoloxía, como fan países como Alemaña ou Italia, a través dunha nova metodoloxía para a actualización da retribución e a convocatoria das poxas para adxudicar 1.200 MW de coxeración. Alfonso Rueda subliñou que “este sistema ten que seguir sendo competitivo para garantir o futuro e a viabilidade de empresas que supoñen miles de postos de traballo, directos e indirectos”.
Oportunidades e ameazas do sector do mar
O titular da Xunta salientou que “a industria do mar está chea de oportunidades, pero tamén de ameazas” e, nese sentido, recordou a necesidade de que se rebaixe o IVE dos seus produtos: “Algo tan básico como a conserva ten que ter o mesmo tratamento fiscal que outros alimentos”, indicou. O presidente da Xunta recordou tamén que é necesario que o sector entre no PERTE Agroalimentario para que se poida beneficiar das vantaxes que implica, e advertiu “sobre os riscos do tratado de libre comercio que a Unión Europea negocia con Tailandia”. Ao seu entender, Bruxelas “debe ter en conta a diferenza de calidade que hai entre o que se fai aquí, que é excelente, e o que se fai noutras partes”, polo que pediu que se asine un acordo comercial que protexa á conserva galega para que poida operar nos mercados internacionais “en igualdade de condicións”.
Para rematar, Rueda enxalzou a galeguidade de JEALSA, unha firma que “malia a súa expansión internacional, non esquece a súa orixe galega e que segue mirando polo porvir da súa terra”. Cun importante investimento en I+D+i, a compañía traballa agora na posta en marcha dunha nova nave no lugar de Bodión (Boiro) e no desenvolvemento dun proxecto de economía circular coa creación dunha biorrefinería mariña que agarda conseguir fondos do PERTE de descarbonización industrial.
