O escritor rianxeiro Ramón Torrado Romero presenta na súa terra, este xoves 3 de maio, a súa novela A petición de Auli, publicada por Belagua Ediciones. O acto terá lugar ás 20.00 horas no Salón de Actos do Auditorio Municipal e será introducido polo alcalde de Rianxo, Adolfo Muíños. Ademais, o autor estará acompañado polo filósofo Ignacio Castro, e a editora, Edurne Baines.
A petición de Auli é unha novela curta que narra a viaxe que realizan xuntos un home adulto e o seu sobriño de 11 anos, Auli. Cun ton de viaxe iniciática, Ramón Torrado escribe unha emotiva novela na que os seus protagonistas, dous seres perdidos, faltos de afecto e con escasa fe no ser humano, irán derrubando os muros que os separan grazas ás experiencias compartidas. Porén, ao final da viaxe, Auli realizará unha petición imposible de asimilar polo seu tío.
Ramón Torrado Romero dedícase ao ensino e é autor, entre outros libros, das novelas Rebeca no val das sombras ardentes e Torino.
