O Auditorio de Rianxo vai dar acollida o vindeiro 27 de novembro (sábado) á presentación do libro Torino, de Ramón Torrado Romero (Rianxo, 1966), editado polo selo local Axóuxere. Acompañarán ao autor Roberto Abuín (Axóuxere Editora) e Adolfo Muíños (alcalde de Rianxo).
Torino é un libro de crónica de viaxes que é tamén unha obra de ensaio, a maiores dun traballo de pensamento. Segundo avanzan dende Axóuxere, “esta travesía física e espiritual pide unha lectura calmada que permita que a imaxinación pinte un retrato das peripecias que se contan e que o pensamento considere as ideas que se ofrecen como flores”.
Torino recolle unha viaxe entre entre Galicia e Italia que lle serve ao autor para mostrarse e explicarse perante a súa familia. A aventura descrita aconteceu no ano 2003 e o texto foi escrito nos dous anos seguintes, pero, segundo avanza o escritor rianxeiro, “os sentimentos experimentados e os pensamentos explorados seguen presentes, coma unha eternidade a repetirse, fundando un cronotopo, un eido onírico que universaliza a vivencia do autor e nola doa”.