A autora Esther Piñeiro presentará en Noia Sempre Lela, publicado pola editorial local Toxosoutos. A cita será este venres 25 de setembro ás 20.30 horas, na Casa da Cultura Antón Avilés de Taramancos. Trátase, segundo avanza o Concello de Noia nas redes, dun pequeno pero moi intenso poemario de 70 páxinas que segue a liña da anterior obra de Esther Piñeiro, Anacos dunha vida, onde asenta as bases da súa poesía intimista e experiencial. Nos seus poemas volve reflectir, cun estilo directo e evocador, experiencias vitais marcadas polas tristuras, os desencantos e as ledicias, así como as súas inquedanzas sobre a nosa terra, a emigración e a decadencia da lingua galega.
