O vindeiro venres 02 de xuño presentarase ás 19.00 horas, na Área Recreativa do Paseo Marítimo de Rianxo (a carón do Castelo da Lúa), o libro O Castelo da Lúa. Construción e propiedade ao longo dos tempos, libro editado polo Concello de Rianxo e autoría de Heitor Picallo Fontes e Alexandra Cabana Outeiro. No acto estarán acompañados polo alcalde Adolfo Muíños.
O libro é un percorrido polas orixes e pola historia da dita construción medieval rianxeira, situada no lugar do Pazo, na punta da Torre, tamén coñecida como A Salgueiriña, crese que construído no século XIII por Pai Gómez Chariño, pasando máis tarde a formar parte do patrimonio da Orde do Temple e despois do da arquidiocese compostelá. Foi derrubado polos irmandiños ó redor do ano 1465 e reedificado novamente por Sueiro Gomes de Soutomaior, bisneto do anteriormente mencionado, até que foi esboroado de xeito definitivo en 1480 polo gobernador real Fernando de Acuña.
