A Asociación Protectora de Animais Moura, con sede na Pobra do Caramiñal, vai organizar este mes de maio unha actividade para recadar fondos a prol dos animais e fomentar as adopcións. A cita será este domingo 7 de maio, nos Xardíns Valle-Inclán da Pobra, onde estará habilitado o posto informativo e solidario para, tamén, dar a coñecer o importante traballo despregado pola protectora no concello e na comarca. “Para levar a cabo esta xornada”, informan, “pedimos ao comercio local que contribuíran coa nosa causa facendo doazóns dos seus produtos, para os cales levaremos a cabo unha serie de sorteo”. O resultado será un mercadiño solidario no que participan de xeito desinteresado establecementos como El Salón (A Pobra), Foto Ríoss, Centro de Bienestar Fervenza (Noia) e Carolina Castelo (A Pobra).
Dende Moura agradecen o labor e compromiso dos locais colaboradores, que, unha vez máis, “envorcaron esforzos coa nosa causa de xeito masivo”.
E engaden: “Convidamos a toda a veciñanza a que se achegue e nos tenda unha man. Teremos todo tipo de produtos, dende óptica, tratamentos de beleza, roupa, produtos para as mascotas, nenos, mercería, gastronomía, bonos de clases particulares e moito máis”.
