O Concello de Ribeira informou do inicio das actividades do Maio Cultural, que traerá unha manchea de contos narrados para toda a familia nos sábados pola mañá. O espectáculo Filipa cos contos, con Fran Campos da compañía Bandullo Azul, abre esta liña de actividade. Será unha función de de narración oral con monicreques para nenos e nenas de 3 a 12 anos e as súas familias. Celebrarase este sábado 6 de maio ás 12.00 horas no Centro Cultural Lustres Rivas. As inscricións deberán ser formalizadas a través da conta normalizacion@ribeira.gal.
Sinopse
O espectáculo é unha sesión filipante de contos para toda a familia. Historias tradicionais, música e humor repártense entre os dous contadores que soben a escena: o actor Fran Campos e a súa amiga Filipa, que dará un valor engadido ás historias de carácter tradicional: a súa experiencia. Pero ollo, que non son uns contos calquera. Entre eses contos haberá tamén historias cantadas. Haberá historias e xogos de palabras feitas cancións. Historias non só do noso entorno máis próximo, senón tamén doutras terras. Contos filipantes, acompañados dunha guitarra. Fran Campos e Filipa, os dous e cadaquén ao seu xeito, farán posible unha sesión para todos os públicos. Tanto nenas e nenos como maiores poderán gozar, aprender, reflexionar… desde as súas distintas visións dos contos populares.
