Máis de 90 ilustracións penduran nas paredes da Casa da Cultura Raquel Fernández Soler. Trátase dunha exposición que chega da man do CEP Pilar Maestú Sierra baixo o título Que grandes artistas as nosas cadrechiñas e cadrechiños! Homenaxe ós/ás ilustradores/as de contos infantís que inaugura a programación do Maio das Letras Galegas da Pobra do Caramiñal.
Alumnado do colexio asistiu na mañá deste 11 de maio á apertura da mostra que comezou ao son da gaita, cunha melodía interpretada por Antón Ferreiro, de quinto curso.
Esta exhibición pictórica ofrece reproducións de obras que ilustran contos infantís e xuvenís como, por exemplo, Elmer, Harry Potter, Oliver y su pandilla, La dama y el vagabundo ou 101 dálmatas, entre outros moitos. A este respecto, a concelleira da Cultura, Patricia Lojo, agradeceu o dinamismo da comunidade educativa e a súa implicación para achegarlle a arte á rapazada a través da experiencia.
Carla Fernández, de sexto curso, falou en representación da rapazada, para destacar a relevancia desta actividade da que son protagonistas.
Tamén tomou a palabra María Mariño como integrante do profesorado que forma o proxecto Little artists, xunto con Angharad Collazo e Andrea Morales. Dirixíndose ás crianzas, afirmou que o feito de que a Casa da Cultura acolla estes debuxos demostra que “oficialmente sondes grandes artistas.” Un orgullo ao que se sumou a directora do centro de ensino, Silvia Folgueira, quen fixo fincapé na importancia de facer equipo.
As visitas poden efectuarse ata 7 de xuño, de luns a venres, en horario de 10.00 a 13.30 e de 17.00 a 20.00 horas.
