Properdis e Servinserta, as empresas sociais da marca Amicos.org, veñen de lanzar a primeira edición dos Premios ás Boas Prácticas en Contratación Responsábel, co obxectivo de “recoñecer e dar visibilidade ás administracións públicas e empresas que impulsan o desenvolvemento da compra ou contratación público-privada socialmente responsábel”. Neste sentido, Amicos.org busca identificar as administracións e empresas galegas con maior impacto na mellora das condicións de integración social e laboral das persoas en risco de exclusión.
Ademais, con esta iniciativa quérese favorecer a contratación responsábel para impulsar a redución das desigualdades sociais, a inclusión e a creación de emprego en Galicia. Así mesmo, búscase potenciar a sensibilización para as contratacións socialmente responsábel en Galicia. “Desde Amicos sabemos que a acción máis pequena é mellor que a intención máis grande”, recoñeceu o director de Amicos, Xoán España, engadindo que “por iso lanzamos este proxecto pioneiro en Galicia que xorde da necesidade de impulsar ás empresas que facilitan a inserción sociolaboral das persoas con discapacidade”, explicou.
“Desde a oficina de contratación responsábel poñemos o foco en crear e manter o emprego das persoas con discapacidade impulsando a contratación tanto no ámbito público como privado”, destacou o director de Amicos.
Categorías dos premios
Estes galardóns están dirixidos a organismos e organizacións con domicilio fiscal ou social en Galicia e contan coas seguintes categorías:
-Administracións Públicas: Autonómica, Provincial, Concellos de máis de 20.000 habitantes e Concellos de menos de 20.000 habitantes.
-Empresas: pequenas, medianas e grandes empresas.As candidaturas poden presentarse a través da web do proxecto Oficina de Contratación Responsábel na seguinte ligazón ata o día 9 de xuño.
O xurado que fallará o resultado estará composto por persoas relevantes nos seus ámbitos profesionais e persoais tanto das administracións públicas como de entidades privadas (sen participar nas súas categorías respectivas), e por membros da Asociación Amicos.
Determinaranse tres finalistas por categorías e os premiados daranse a coñecer nun acto público de entrega de premios que se celebrará en xuño. Para calquera dúbida pódese consultar no seguinte enderezo: info@oficinacontratacionresponsable.com
Premio Recoñecemento Sobresaliente
Ademais, Properdis e Servinserta concederán un premio honorífico dirixido a aquela persoa, empresa ou administración pública que destaque pola súa iniciativa emprendedora e a súa traxectoria profesional no eido da responsabilidade social.
