A Consellería do Medio Rural levou a cabo diversos traballos preventivos no distrito forestal IV – Barbanza, no concello de Padrón, que consistiron fundamentalmente na roza de faixas auxiliares e da plataforma de pistas forestais co fin de protexer os montes contra os incendios forestais. Realizáronse en terreos de xestión pública e en zonas de alto risco de incendio (ZAR).
Desta forma, para a roza de faixas auxiliares utilizouse maquinaria de brazo en ambas marxes. Por outra banda, para a roza de plataforma de pistas forestais traballouse con maquinaria de cadeas, con varias pasadas, para que o mato quedase perfectamente cortado e triturado. Deste xeito, mellóranse as vías de comunicación xa existentes ao monte, o que facilita o acceso do dispositivo de loita contra incendios. Como resultado final destas accións preventivas, actuouse en preto de 70 hectáreas de superficie dos distintos montes das parroquias de Herbón, Iria, e Carcacía.
Estes traballos enmárcanse no Plan preventivo da Consellería do Medio Rural. Cabe lembrar que no aprobado para o período entre abril de 2023 e marzo de 2024, prevese actuar en cando menos unhas 60.000 hectáreas de terreo e nuns 5.600 km de pistas forestais e outras vías, ademais de en case 4.840 puntos de auga, entre creación de puntos novos e mantemento dos existentes. O Plan contará cun orzamento de case 38,8 millóns de euros, máis dun 17% de aumento con respecto ao de 2022.
