A Unidade Veciñal de Dodro presénntase por terceira vez as eleccións municipais coa experiencia de catro anos na oposición e as catro últimas no Goberno municipal, xestionando as areas de Cultura e Patrimonio (da man de Xoán Xosé Vicente) e a de Educación Deportes e Emprego (Abel Tarrío Abuín). Na presentación do programa e da lista, a UVD salientou a consecución de grandes avances nas súas respectivas áreas, como a rehabilitación das escolas do CRA e o investimento de 1.403.320,65 € na rehabilitación do CPI Eusebio Lorenzo Baleirón, a recuperación do Hórreo do Arco, os Petróglifos de Bouza Abadín ou a Ruta Pensa Nao, que “son avances moi valorados tanto polos veciños de Dodro como por quen visita este concello”, explicaron.
Preséntase de candidato a alcaldía Xoán Xosé Vicente cunha lista completa de homes e mulleres, a de mais candidatos de todo o concello, onde priorizarán “a recuperación das instalacións municipais do Pavillón Polideportivo ou a Casa do Regadío e o incremento de servizos para a nenez e as persoas maiores, sen esquecerse do río, a mellora do PXOM e a total colaboración co tecido asociativo e veciñal como medio para logralo”.
O acto desenvolveuse no auditorio do local social da AAVV de San Xoán de Laíño en Imo, ante numerosos veciños que ateigaron o recinto. A cita foi amenizada polo músico local Secho que cantou o tema (entre outros) Fano eles, que xa é o himno deste partido político.
A presentación levouna a cargo Vitoria Rei, ex-concelleira da Corporación municipal de Dodro, que foi dando paso aos catro primeiros postos na candidatura, Amparo Angueira, Abel Tarrío, Rebeca Rial e Xoán Xosé Vicente Franco.
Xoán Xosé Vicente Franco, candidato á alcaldía, fixo fincapé en dúas cuestións fundamentais: a mocidade e os maiores ou a necesidade de apoio a estes dous colectivos tan importantes nun concello rural coma Dodro. E tamén puxo o foco nos obxectivos acadados nesta lexislatura nas áreas nas que tiveron responsabilidades políticas e que cumpriron practicamente en toda a totalidade e recalcou o compromiso da Unidade Veciñal de Dodro coa cultura e patrimonio, co idioma galego, coa educación e sanidade pública, co feminismo, co deporte e coa necesidade de traballar polo ben común.
Rematou o acto cunha xuntanza arredor duns petiscos onde os candidatos intercambiaron ideas e obxectivos cos veciños asistentes.
