Este 4 de outubro (domingo) a veciñanza de Dodro ten unha cita cos cogomelos. Será unha xornada micolóxica organizada polo Concello para aprender e recoller diferentes tipos de cogomelos e coñecer as súas principais características para telos sempre identificados e non confundilos con especies perigosas. Tamén se porá o foco nas súas propiedades gastronómicas e alimenticias.
A xornada comezará ás 9.00 horas (ata as 10.00 horas) cunha conferencia no Pavillón Municipal de Deportes. Ao remate e ata as catro da tarde unha saída guiada para recoller cogomelos que rematará coa limpeza e o reparto dos mesmos. O Concello lembra a conveniencia de acudir con roupa e calzado cómodo, cesto, navalla, pincel e comida para o xantar.
En caso de chuvia a iniciativa non será cancelada.
Hai que inscribirse antes do 30 de setembro, xa que as prazas son limitadas, no teléfono 981802472 ou na Casa da Cultura.
A xornada conta coa colaboración da Deputación da Coruña.
