Numerosas persoas asistiron este sábado no auditorio de Rianxo á entrega do título de Fillo Predilecto do municipio ao arcebispo emérito de Tánxer, Santiago Agrelo Martínez. No acto público, o primeiro en intervir foi o alcalde, Adolfo Muíños, quen resaltou que a elección do frade como fillo predilecto de Rianxo foi aprobada por unanimidade dos membros da corporación municipal.
O en cargado de ler a laudatio foi Xosé Luís Axeitos (membro da Real Academia Galega e primo de Agrelo), quen repasou a súa traxectoria desde o seu ingreso en 1953 no convento franciscano de Herbón con 11 anos. Foi ordenado en 1966 e exerceu o seu labor 18 anos en Roma, 12 en Marrocos e case 30 en Santiago.
Agrelo dixo sentirse orgulloso de ter nado nun concello solidario e lembrou os inicios da súa vocación cando era un neno.
