O Centro Cultural Lustres Rivas vai exhibir a partir do 5 de maio unha exposición titulada Óleos e acuarelas a cargo de José Luis Blanco Fernández: ribeirense de adopción que foi quen de compaxinar a súa paixón pola pintura coa xerencia, xunto a súa dona, dunha tenda local: o establecemento Calzados Luís.
A mostra, inédita ata agora, exhibe paisaxes, mariñas e xentes do mar, temas recorrentes na súa obra e que reflicten a forte pegada de Ribeira e a comarca no autor. Esta liña de traballo conxúgase con representacións figurativas de estilo expresionista baseadas en experiencias e reflexións liberadoras na súa traxectoria vital.
A súa apertura está prevista para o venres 5 de maio ás 21 horas.
José Luis Blanco Fernández ten participado en exposicións colectivas no Círculo Mercantil de Vigo, na Bienal de Artes de Pontevedra, en Santiago, no seu Padrón natal ou en Porto do Son. Entre outros recoñecementos, acadou o primeiro premio no Primeiro Certame de Pintura do Concello de Cedeira.
A mostra permanecerá no Lustres Rivas ata o domingo 27 de maio. Poderá ser visitada de luns a venres de 10 a 14 e de 19 a 21 horas e os sábados de 11 a 14 horas.
