A primeira xornada da folga indefinida convocada en solitario pola Confederación Estatal de Sindicatos Médicos (CESM) en Galicia sáldase con pouco máis dun 14 % de participación, segundo os datos ofrecidos na tarde deste martes pola Xunta de Galicia, que resalta “que o 85,4 % do persoal acudiu a traballar”. Un seguimento á convocatoria de folga entre os facultativos que se reduce aínda máis na Atención Primaria onde pouco máis do 5 % dos médicos non acudiron este luns para traballar.
O que reflicte que o seguimento da convocatoria foi maior nos Hospitais da comunidade fronte aos Centros de Saúde o que provocou, segundo estes mesmos datos da Xunta de Galicia, que se suspenderon de 163 cirurxías (o que supón o 26% da actividade media diaria), máis de 3.700 consultas externasCCEE (19%) e que tivesen que pospoñerse case 400 probas (2’8%).
Estes datos difiren dos ofrecidos polos convocantes que elevan o seguimento da folga ao 60 % dos traballadores que podían exercer este dereito o que cualificaron de “histórico”.
A administración sanitaria galega tamén quixo destacar que o grao de cumprimento dos servizos mínimos durante a xornada está a ser do 100% polo que asegura que “na xornada de hoxe a Sanidade pública galega está a responder adecuadamente a todas as urxencias”.
Así, o seguimento é do 11,38% na área Sanitaria da Coruña e Cee; do 12,90% na área Sanitaria de Ferrol; do 13,91% na área Sanitaria de Santiago de Compostela e Barbanza; do 15,31% na área Sanitaria de Lugo, A Mariña e Monforte de Lemos; do 12,86% na área Sanitaria de Ourense, Verín e O Barco de Valdeorras; do 6,99% na área Sanitaria de Pontevedra e O Salnés; e do 23,71% na área Sanitaria de Vigo.
