O Concello de Ribeira vén de aprobar inicialmente o proxecto de urbanización do futuro Polígono Industrial: un documento que foi encargado á empresa Monsa Urbanismo S.L. e que, xunto co proxecto de expropiación e os servizos arqueolóxicos, marca o rumbo para a creación de preto de 260.000 metros cadrados de chan industrial no entorno de Fontenla e Pedras Vermella.
Neste senso, o Boletín Oficial da Provincia anuncia no día de hoxe que o prazo de exposición pública será dun mes (prazo que comezará a computar unha vez se notifique esta aprobación a todos os interesados).
O proxecto, de máis de 700 páxinas de extensións abrangue diversos aspectos cos que materializar a urbanización da área afectada, de 258.926,24 metros cadrados de superficie, tales como a execución e
acondicionamento de vías públicas, aparcadoiros, saneamento, abastecemento, subministración de enerxía eléctrica e canalización de gas, sinalización, mobiliario urbano e axardinamento de espazos
libres, entre outros elementos.
Así, dedica 156.807,64 metros cadrados a chan industrial, 1.150,68 a equipamento, 64.770,12 a espazos libres, 577,53 a servizos urbanos e 35.620,27 ao sistema viario. O proxecto prevé a dotación de 456
prazas de aparcamento públicas e outras dúas máis para autobús.
O orzamento base de licitación ascende a 12.454.808,65 euros, IVE incluído e o prazo de execución de 22 meses: cifras ambas que se espera se acurten durante o proceso de licitación a partir das ofertas
presentadas.
Proxecto de expropiación
Por outra parte, hai que recordar que o proxecto de expropiación tamén foi aprobado inicialmente, estando prevista a súa aprobación definitiva no pleno ordinario do presente mes de marzo.
