As actividades deseñadas arredor do Día Internacional da Muller, que se conmemora cada 8 de marzo, continúan en marcha na Pobra do Caramiñal. A Concellaría da Igualdade, da cal é titular a edil Charo Varela (Nós Pobra), lanzou unha ampla programación cunha especial énfase nos eidos educativo e social. Entre estas actividades atópase a segunda edición do concurso Igualdade, conta comigo!, certame que marca a compoñente literaria.
Trátase dun concurso de microrrelatos orientado á poboación adolescente e adulta para fomentar uns valores baseados na igualdade de oportunidades entre mulleres e homes e eliminar comportamentos e actitudes que manteñen os estereotipos de xénero. Repartirá 600 euros en premios e o prazo de presentación mantense aberto ata o día 30 de marzo. Preténdese así impulsar un exercicio de reflexión, sensibilización e difusión.
As bases están ao dispor das persoas interesadas en www.apobra.gal.
