A semana pasada os representantes educativos do Goberno autonómico e do Concello de Outes visitaron as instalacións da nova Biblioteca do CEIP de Outes, unha área de estudo, consulta e préstamo de libros que ten unha superficie de 300 metros cadrados e que conta, entre outros elementos, cunha área de lectura e un espazo específico para emisións de radio e gravación-proxección de audiovisuais. Trátase, segundo sinalou o alcalde Manuel González, “dun logro da comunidade educativa do centro na que participaron o Goberno do Estado, a Xunta de Galicia e o Concello”.
Dende a Xunta salientaron que o novo servizo constitúe “un espazo moito máis amplo e mellor equipado con zona de radio e audiovisuais e con novos fondos bibliográficos e mobiliario”.
A directora xeral Ordenación e Innovación Educativa, Judith Fernández, salientou que o servizo é “o resultado dunha complexa obra de reordenación de catro aulas e un corredor central mediante o derribo de tabiques, arranxo de xuntas, tapiado de portas, colocación de tarima e cambio de xanelas”.
