A acción das Brigadas Deseucaliptizadoras, creadas en Lousame (Froxán) para liberar de maneira participativa e colaborativa os nosos montes de especies invasoras, vai comezar con forza este mes de marzo. Farao, por unha banda, traballando coa Comunidade de Montes de Darbo (Cangas) nunha nova roga no Morrazo este sábado 4. “Será unha xornada dura de corta de eucaliptos novos, mais de certa altura, así como de carga e distribución da madeira. Tamén aproveitaremos para arrincar brotes e descascar”, explican dende as Brigadas, que fan un convite, xunto coa Comunidade de Montes, a toda a veciñanza do Morrazo para “traballar connosco e ceibar o noso monte dunha especie foránea adaptada a climas alleos extremadamente secos que, a día de hoxe, avanza sen control e supón a principal ruína do monte e dos bosques de Galiza e Portugal”.
“Coa firme vontade de botarse ao monte e traballar, estamos a tempo de salvar o futuro do monte galego, así como o noso espacio como parte dunha natureza que, en definitiva, é a casa de todas e todos”, explican.
A segunda cita será ao día seguinte, o 5 de marzo, moi preto de Froxán: en Vilacova, tamén en Lousame. Darase continuidade ao traballo iniciado en maio de 2021, cando as Brigadas Deseucaliptizadoras iniciaron o traballo de deseucaliptización no Monte da Aguieira (Vilacova) onde foron esnaquizados e tripados os rebrotes dos eucaliptos nunha das parcelas de varias hectáreas do monte veciñal. O próximo 5 de marzo as voluntarias e voluntarios volven á carga da man da Comunidade do Monte Veciñal en Man Común de Vilacova, en Lousame. “Nesta xornada”, explican, “continuaremos eliminando os rebrotes para rematar de secar os eucaliptos na zona que quedou sen intervir e ao rematar o traballo, seguiremos cun xantar comunitario”.
As Brigadas
As Brigadas Desucaliptizadoras son unha iniciativa da Asociación Ecoloxista Verdegaia que teñen como obxectivo mobilizar, organizar e coordinar persoas de todo o país con vontade de botarse ao monte para realizar accións de voluntariado ambiental en colaboración coas titulares de terreos con valores ambientais degradados ou ameazados pola eucaliptización e outras especies exóticas invasoras. Faise mediante a erradicación destas especies e a súa substitución por outras autóctonas de alto valor ecosistémico. As accións das Brigadas teñen como obxectivo que as zonas intervidas non volten a ser pasto do lume e que sirvan como zonas protectoras, actuando como cortalumes verdes e corredores de biodiversidade.
