Fontes policiais informaron, segundo recolle o Diario de Arousa, dun intento de secuestro a un muller en Ribeira, na noite deste luns 6 de febreiro. Foi na avenida da Coruña, no número 42, onde reside a persoa que foi vítima do secuestro finalmente frustrado e que, na tirapuxa coa persoa que tentou levala (supostamente un home novo, do que non transcendeu polo de agora máis información), puido resultar con mancaduras de diversa consideración.
Até o lugar desprazáronse varias patrullas da Policía Nacional tras recibir alerta do suceso, a piques de chegar á medianoite do luns. Nun primeiro intre non puideron acceder ao inmóbel por terllo impedido o suposto secuestrador, que lles bloqueou a porta de entrada á residencia. En consecuencia, os axentes solicitaron a intervención do Parque de Bombeiros de Ribeira, que procederon a permitir a entrada do fogar. Até o de agora non foi comunicada máis información sobre o suceso, máis alá da habilitación dun cordón de seguridade no portal do inmóbel e da detención do home que impediu o paso dos axentes, supostamente o autor da tentativa de secuestro.
