A Consellería de Política Social compartiu máis detalles sobre as melloras aplicadas ao Centro Sociocomunitario da Pobra do Caramiñal, un proceso de posta a punto que mobilizou 282.000 euros, que incluíron, entre outras cousas, a substitución das carpintarías exteriores e do lucernario central e o fornecemento de protección nas xanelas.
A conselleira Fabiola García visitou recentemente as instalacións onde puido comprobar o resultado das actuacións levadas a cabo durante os últimos meses. García destacou que o obxectivo destas obras “foi garantir unha mellor calidade ao servizo, e que as persoas usuarias poidan seguir desfrutando das actividades que nel se realizan”.
Fabiola García visitou tamén a residencia de maiores pública autonómica da Pobra do Caramiñal, na que o Goberno galego acaba de investir 500.000 euros para a renovación da fachada e para mellorar a eficiencia enerxética das instalacións, así como a comodidade dos usuarios.
Máis servizos no Barbanza
Na comarca do Barbanza a Xunta ampliou recentemente as prazas públicas no Centro de Día da Pobra; continúase coa construción dunha nova residencia pública autonómica en Ribeira; o pasado ano inaugurouse o Punto de Encontro Familiar do Barbanza; e hai unhas semanas renovouse o financiamento da unidade de atención temperá, que lle dá servizo ás familias da Pobra, Ribeira e Boiro.
