O Entroido 2023 de Boiro fará historia pola cantidade, a calidade e a variedade das propostas, e tamén polo importante número de entidades e veciños implicadas/os na organización, todas achegando o seu importante gran de area. O programa, elaborado polo Concello, a Asociación de Veciños da Boliña e a Asociación Cultural Peñas Boiro, foi presentado este 1 de febreiro pola concelleira de Cultura, María Outeiral e os representantes das ditas asociacións: Alfonso Alcalde e David Boga, respectivamente.
Segundo explicaron, as actividades do Entroido 2023 comezan o sábado día 18 de febreiro coa celebración da XIV Festa da Orella de Porco e outros produtos típicos do Entroido que organiza a Asociación de Veciños da Boliña. “Contaremos con animación musical e outras actividades, así como prevemos 700 racións de orella de porco e outros doces e produtos típicos do entroido”, afirmou Alfonso Alcalde.
As actividades, que terán lugar na Boliña no Campo de Revelar, comezarán ás 19.00 horas e contarán coas actuacións do Dúo Charada e o Dúo Rosán, pintacaras, photocall… e haberá carpa. Os festexos o sábado 18 de febreiro continúan na praza de Galicia con discomóbil a partir das 23.00 horas a cargo da Asociación Peñas Boiro.
O domingo día 19, a partir das 17.00 horas, celebrarase o tradicional desfile infantil pola rúa Peonil que sairá da praza da Mancomunidade até a praza de Galicia. Ás 18.00h na praza do Concello haberá festa infantil con DJ Matrek.
O luns 20 de febreiro ás 10.30h no Centro Social de Cabo de Cruz haberá obradoiros de Entroido. Ás 18.00 horas a paza do Concello dará acollida a unha actuación de Peter Punk para público infantil. A partir das 22.30 horas, organizada por Peñas Boiro, haberá festa do Entroido coa orquestra La Fórmula e discomóbil. “Dende Peñas Boiro queremos facer actividades mais alá dos propios días das festas do verán e este ano participamos tamén no Entroido, realizando actividades que dinamicen o municipio aproveitando os festivos”, recoñeceu o membro da directiva, David Boga.
O martes de Entroido, festivo local, levarase a cabo o tradicional concurso e desfile de Entroido que sairá ás 18.00 horas da praza de Galicia e fará un percorrido pola rúa peonil e a rúa Principal para volver á praza de Galicia onde se fará entrega dos premios e haberá festa infantil con DJ Matrek.
O mércores haberá unha nova sesión de obradoiros no Centro Social de Cabo de Cruz a partir das 10.30 horas para nenos e nenas.
“Este ano temos unha programación de Entroido moi completa, con propostas e actividades para todas as idades que xorden das sinerxías tan importantes entre entidades e asociacións e o Concello”, recoñeceu a concelleira de Cultura, María Outeiral.
A programación do Entroido continúa a fin de semana seguinte. Así, o sábado 25 haberá un obradoiro infantil na Biblioteca Municipal de Boiro a partir das 12.00 horas e, pola tarde, festa do Felipiño en Escarabote.
O domingo 26 celebraranse os tradicionais enterros nas distintas parroquias: Farruco en Cabo de Cruz, Cunca de Praia Xardín, o Óso de Abanqueiro e o Felipiño de Escarabote.
Coma en anos anteriores, o Concello de Boiro poñerá un tren e animación musical con gaiteiros que percorrerá todos os enterros.
