O Centro Cultural Lustres Rivas vai albergar o martes 7 de febreiro un curso dedicado a coidadores e coidadoras de persoas con alzhéimer.
Trátase dunha acción formativa organizada pola Escola Galega de Saúde para os Cidadáns en colaboración cos Servizos Sociais do Concello que está dirixido “ás persoas que no seu día a día conviven coa enfermidade, xa sexan coidadores formais ou informais, e público en xeral”.
Ten por obxectivos:
-Adestrar aos/as participantes do curso das ferramentas precisas para facer fronte aos coidados específicos a persoas que padecen alzhéimer e outras demencias neurodexenerativas.
-Coñecer, entender e aplicar na practica, a necesidade de establecer unha estrutura a cal deberá soportar o desenvolvemento posterior como coidador.
O curso, que se vai desenvolver entre as 17 e as 20 horas, pretende mostrar a través de diferentes metodoloxías, a necesidade de establecer un punto de partida cara o proceso e posta en marcha da nova situación; identificar, avaliar e analizar elementos emocionais que inflúen no proceso; e avaliar as características persoais de cada situación.
A actividade terá como profesor a Miguel Ángel Gómez Vázquez, avogado, experto universitario en mediación familiar e xestión de intelixencia emocional.
Inscricións
As persoas interesadas poden anotarse ata o 7 de febreiro a través da web da Escola Galega de Saúde para os Cidadáns.
