A organización humanitaria Humana Spain ofreceunos un novo balance relativo ao ano 2022 da súa actividade solidaria en Porto do Son, materializada a través da colaboración veciñal e do Concello e grazas aos seus sistemas de recollida de roupa, presentes no municipio. Así, no informe faise saber que durante o ano que vimos de deixar atrás, os contedores de Humana Spain recuperaron en Porto do Son máis de 19 toneladas de téxtil usado para darlles unha segunda vida cun beneficio ambiental e social.
Ademais, evitouse a emisión de 122 toneladas de CO2 á atmosfera. Por outra banda, no informe sinálase que os recursos obtidos coa xestión do residuo téxtil permiten “a creación de empregos verdes” e “financian programas de desenvolvemento en países do sur”.
Dende 1987
Humana promove desde 1987 a protección do medio ambiente a través da reutilización de téxtil e leva a cabo programas de cooperación internacional ao desenvolvemento en África, América Latina e Asia e de apoio local, sensibilización e agricultura urbana en España. Os seus obxectivos pasan tamén por mellorar as condicións de vida das comunidades máis desfavorecidas do planea, facilitar o seu progreso económico e social e promover a economía circular.
