Representantes de entidades sociais de defensa das linguas minoritarias do Estado homenaxearán a Castelao e a Rosalía de Castro, o domingo 22 de xaneiro ás 12h no Panteón de galegos ilustres, nun acto que contará con intervencións de representantes da Mesa pola Normalización Lingüística, de Euskalgintzaren Kontseilua e da Plataforma per la Llengua e coa actuación musical de Uxía e Os Trinquetes.
Segundo lembra A Mesa, este 29 de xaneiro cúmprense 137 anos do nacemento de Castelao e o 23 de febreiro, 186 do nacemento de Rosalía de Castro. Deste xeito, as entidades en defensa das linguas galega, vasca e catalá queren aproveitar a proximidade de ambas as dúas datas para destacar “o valor referencial que teñen Rosalía e Castelao, cada un no seu tempo, na reivindicación da normalización da lingua galega e, por extensión, de todas as linguas propias dos seus países, cun legado que permanece vivo na actualidade a través do activismo para restitución plena dos respectivos idiomas”.
Este 2023 no que tamén se celebra o centenario do primeiro Galeusca, as entidades sociais de defensa das linguas do Estado renden tributo a Rosalía e a Castelao e reafirman a “vontade de afondaren nas relacións que manteñen e de traballaren conxuntamente”. Este traballo conxunto materializouse os últimos anos nas accións a respecto da Lei Audiovisual, iniciativas no Congreso ou pola defensa dos dereitos lingüísticos conxuntamente con outras entidades doutros territorios do Estado.
