O Concello da Pobra do Caramiñal, ao abeiro das súas actividades de sensibilización co coidado do medio ambiente e impulso dos hábitos sustentábeis, desenvolveu esta tempada varias actividades divulgativas para a rapazada que puxeron o foco na reciclaxe de téxtil.
A concelleira do Medio Ambiente, Genoveva Hermo (Nós Pobra), informounos de que alumnado do CEP Salustiano Rey Eiras e do CEP Pilar Maestú Sierra acolleu este 16 de xaneiro un obradoiro para o aproveitamento de vestimenta en desuso da man de Humana, coa colaboración da Urbaser. Converteron así camisetas en bolsas de tecido e aprenderon a importancia dos tres R: reducir, reciclar e reutilizar.
Previamente a esta acción, no 10 de decembro, a rapazada asistente á Pequetroula tamén puido participar nun taller desta mesma índole e converter calcetíns en monicreques cos cales xogar.
A edil tamén lembra o proxecto de reciclaxe de téxtil existente na Pobra do Caramiñal cunha ducia de colectores específicos repartidos pola súa xeografía para “facilitar a separación na orixe e evitar que a roupa e o calzado acaben no contedor xenérico”, engadiu.
