A Asociación Ambar forma aos seus usuarios en competencias dixitais

Este luns 23 de xaneiro deu comezo no Centro de Recursos da Asociación Ambar (Frións, Ribeira)a actividade formativa do programa Dixitalíza-T, que, como se indica no seu nome, consiste nunha iniciativa para capacitar aos asistentes en competencias tecnolóxico-dixitais. O programa está composto por catro módulos formativos e está destinado a persoas con diversidade funcional e cognitiva da comarca do Barbanza.

Segundo explica Ambar, o obxectivo xeral do programa é “mellorar a autonomía” dos usuarios da asociación a través da adquisición de novas competencias dixitais que lles “permitan mellorar a vida diaria a través de medios telemáticos”.

O grupo que iniciou a formación está composto por oito persoas con diversidade funcional. O programa constará de 160 horas comezando este luns 23 de xaneiro do 2023 e rematando o luns 13 de marzo do 2023.

Jaime Capilla, coordinador do programa, fixo este luns 23 de xaneiro a presentación do primeiro modulo que impartirá Ahinoa Parga. Tanto ela como Lidia Mariño, profesionais da Asociación Ambar, serán as encargadas de levar a cabo as accións formativas.

Sobre o programa

Dixitalíza-T divídese en catro módulos formativos: buscas na Rede, correo electrónico, trámites en liña e empregabilidade online. O enfoque das accións céntrase en ofrecer alternativas de formación dixital de maneira práctica, incrementar as posibilidades de accesibilidade dixital das persoas con diversidade funcional e romper os estereotipos existentes sobre as persoas con diversidade intelectual e o acceso a contidos a través da Rede. Este programa en competencias dixitais é posíbel grazas ao financiamento de Fundación ONCE.