A Asociación Ambar das Persoas con Diversidade Funcional comunicou esta semana que xa ten dispoñíbel para a súa pre-venda ou reserva o Calendario Solidario 2023. A asociación da nosa comarca fixo saber, con motivo do lanzamento, que esta novena edición vai “ser bastante especial” xa que por primeira vez versará sobre doce das series españolas máis recoñecidas.
Para a elaboración do calendario volveuse contar coa colaboración do fotógrafo Victor Manuel Martínez (Pichero) que nestes momentos está traballando cos protagonistas do Calendario Solidario 2023. Este ten un custe de sete euros na súa versión de parede e 3,50€ na de mesa. Pode reservarse tanto na web da entidade (asociacionambar.org) como nas canles habituais. Ou sexa, chamando ao número 981 87 44 80 ou escribindo a correo@asociacionambar.org. As primeiras 20 persoas que o reserven recibirán un agasallo dos obradoiros artesanais de Ambar.
Un calendario de película
Este proxecto, que comezou a súa andadura no ano 2015 e que promove o cine con valores sociais e o apoderamento das persoas con diversidade funcional a través da expresión artística, é unha iniciativa para recadar fondos que sustenten proxectos dirixidos a mellorar a autonomía e a calidade de vida das persoas con diversidade funcional.
O lanzamento acompañouse dun vídeo promocional no que se amosa a elaboración do calendario.
