A concelleira de Cultura, Sanidade e Relacións Institucionais do Concello da Pobra do Caramiñal, Patria Lojo Nine, e maila concelleira de Noia e deputada provincial adscrita ás áreas de Mocidade e Educación, Sandra González Castro, visitaron o concello de Ames para interesarse polo plan de prevención de incendios forestais que o Goberno municipal puxo en marcha en 2016. Ademais, visitaron o Centro de Saúde do Milladoiro para coñecer un ambulatorio de recente construción, xa que na Pobra do Caramiñal solicitaron a mellora do seu dispensario e en Noia vai a Xunta de Galicia a construír un novo centro médico.
O alcalde de Ames, Blas García, o concelleiro de Transición Ecolóxica e Medio Ambiente, Manuel Lens, e á técnica do departamento de Medio Ambiente, Patricia Reboreda, mantiveron un encontro a semana pasada coa concelleira de Cultura, Sanidade e Relacións Institucionais do Concello da Pobra do Caramiñal, Patricia Lojo Nine, e maila concelleira de Noia e deputada provincial adscrita ás áreas de Mocidade e Educación, Sandra González Castro.
Como dixemos, a visita das dúas concelleiras foi en boa medida para coñecer o plan de prevención de incendios forestais que o Goberno municipal amesán puxo en marcha en 2016. Deste xeito, deron conta das franxas de protección e recibiron datos sobre o plan de prevención de incendios forestais local, o cal tiñan interese en coñecer pola vaga de incendios do pasado verán que afectou ao Barbanza, e en especial A Pobra do Caramiñal. O alcalde, o concelleiro de Transición Ecolóxica e maila técnica de Medio Ambiente explicáronlles o que se fixo neste eido e entregóuselles un dossier cos datos dos sete anos que leva funcionando dito plan.
O Concello de Ames puxo en marcha en 2016 un plan de prevención e defensa contra lumes forestais baseado na repoboación de faixas secundarias con árbores frondosas caducifolias como castiñeiros, freixos, abeleiras, cerdeiras, pradarías, bidueiros, nogueiras, ameneiros, maceiras, pereiras ou carballo americano. Deste xeito, o Concello busca, ademais de “afastar posíbeis incendios dos núcleos de poboación”, “recuperar a calidade do solo e aminorar a perda de biodiversidade, ocasionada pola tala masiva nestes espazos de contención”. Dende a súa posta en funcionamento actuouse en cinco parroquias plantando 5.111 árbores en 20 hectáreas de monte grazas á colaboración de máis de 100 propietarios/as que se adheriron ao plan.
O Concello de Ames prioriza o fomento de plantación de frondosas caducifolias en aquelas parcelas tipificadas como de risco alto ou moi alto. Concretamente definíronse 59 ámbitos de actuación para levar a cabo este plan de prevención.
Visita ao centro de saúde do Milladoiro
Ademais, visitaron o centro de saúde do Milladoiro onde foron recibidos pola coordinadora do dispensario, Magdalena Seco, que lles explicou o funcionamento de dito centro. Tanto Patricia Lojo como Sandra González tiñan interese en coñecer un ambulatorio de recente construción, xa que na Pobra do Caramiñal solicitaron a mellora do seu dispensario e en Noia vai a Xunta de Galicia a construír un novo centro médico.
O alcalde de Ames, Blas García, destaca que “para o Concello de Ames é unha satisfacción que outros Concellos se fixen e se interesen polas políticas que desenvolvemos en Ames, as cales queremos poñen en común e compartir con outros municipios, algunhas delas xa contrastadas, como son o plan de prevención de incendios forestais, os servizos de conciliación, programas de promoción da saúde como Ames Saudábel, etc”
