Papagena, a opera electrónica en galega da compañía ButacaZero, dirixida por Xavier Castiñeira e a rianxeira Esther F. Carrodeguas, vaise representar este sábado 12 de novembro, ás 21 h, no Auditorio Municipal de Muros. As entradas para o espectáculo teñen un custo de 3,50 € e xa é posible reservalas no teléfono 981 76 22 94 ou a través do formulario web cutt.ly/PapagenaMuros.
Trátase dunha ópera electrónica contemporánea de pequeno formato en galego, con perspectiva de xénero, que narra a historia dunha parella engaiolada nunha relación tóxica. O elenco está formado pola soprano noiesa Esperanza Mara e o barítono Jacobo Rubianes que actúan acompañados no escenario por Iago Hermo, compositor da ópera e do libreto e tamén director musical da peza.
Papagena é unha ópera electrónica inspirada na parella de persoas-paxaro da célebre A frauta máxica, de Mozart. A peza, na que Castiñeira e Carrodeguas asumen por primeira vez a dirección escénica dunha ópera, nace da vontade de afondar nos clixés de xénero presentes no eido da creación operística, mais tamén pretende rachar con outras percepcións habitualmente asociadas ao mundo da lírica: a lingua, os espazos de representación, o público destinatario ou mesmo o formato. Para conseguilo, Iago Hermo deseñou unha ópera electrónica, baseada nas súas investigacións arredor do espectralismo minimalista. O resultado, coa colaboración de Ana Arteaga na escenografía e de Diego Valeiras no vestiario, é “un espectáculo musicalmente inmersivo e visualmente contemporáneo que levará a ópera a vilas onde non adoita chegar este estilo musical”, segundo explican dende ButacaZero, engadindo que logo do seu paso por Muros, Papagena proseguirá a súa xira por outras tres localidades galegas ao longo do mes de novembro. Así, as seguintes citas van ser en Boiro (18 de novembro), Bueu (19 de novembro) e Foz (25 de novembro). Todas as datas, horarios e sistema de acceso ás funcións de Papagena está dispoñíbel na páxina web da compañía: butacazero.net.
