O Concello de Boiro celebrou este venres pola mañá os actos conmemorativos do 25N, Día Internacional da Violencia Conta as Mulleres. Fíxoo cunha lectura dun manifesto colectivo e unha mesa de traballo para establecer protocolos de actuación ante agresións machistas. No acto participaron o alcalde de Boiro, José Ramón Romero, e a concelleira de Igualdade, Dores Torrado; xunto con outros membros da Corporación.
O acto central tivo lugar ás 12.00 horas na praza de Galicia e comezou cun minuto de silencio e a lectura dun manifesto colectivo que realizaron, conxuntamente, persoal do CIM, hostaleiros do municipio, alumnado dos centos educativos, forzas e corpos de seguridade e asociacións. O manifesto deste ano centrouse na visibilización das violencias machistas acontecidas no eido do ocio.
Previamente ao acto institucional, o alcalde de a concelleira de Igualdade mantiveron un encontro coas mulleres usuarias do CIM que forman parte do Grupo de Autocoidado coordinado e acompañado, un espazo que vén funcionando dende o mes de outubro e do que forman parte mulleres que sufriron algún tipo de violencia de xénero. O grupo expuxo ao alcalde e a concelleira as eivas detectadas á hora de tratar os casos de violencia.
A xornada rematou cunha mesa de traballo participativa na que formou parte persoal do CIM, mocidade, asociacións, hostaleiros e forzas e corpos de seguridade. Esta mesa tivo como finalidade a posta en común de impresións para elaborar un protocolo de actuación de forma colectiva e coordinada para a diagnose das violencias machistas no ámbito do lecer.
