Este xoves 3 de novembro celebrouse en Rianxo a presentación da II Andaina Solidaria ASANOG (Asociación de Axuda a Nenos Oncolóxicos de Galicia), coa organización de ASANOG e a colaboración do Concello de Rianxo. A presentación estivo presidida por Adolfo Muíños, alcalde de Rianxo, Xusto Ordóñez, concelleiro de Deportes, Adrián Mosquera, atleta paraolímpico rianxeiro e padriño da proba e Sara Muñiz, representante de ASANOG.
Adolfo Muíños destacou a importancia deste tipo de eventos e resaltou “a gran aceptación que esta andaina volve ter en Rianxo”, dando as grazas á veciñanza e ao tecido empresarial que apoia a proba.
Pola súa banda, Xusto Ordóñez e Sara Muñiz falaron dos aspectos técnicos. Segundo explicaron, a andaina vén con dous percorridos a facer,, cunhas distancias de 4 quilómetros e 11 quilómetros, respectivamente. Tamén fixeron saber que debido a alta participación, e “dado que foron cubertas todas as prazas”, pechouse a inscrición este xoves 3 de novembro pola tarde. As previsións apuntan a que se recadará mais de 10.000 €. e que a participación chegará ás 750 persoas.
A andaina, que se celebra este sábado 5 de novembro, comezará as 10:30 horas desde a praza Castelao e contará con música a cargo de DJ locais.
