Persoas maiores adquiren competencias tecnolóxicas na Pobra do Caramiñal

O Centro Sociocomunitario e de Benestar da Pobra do Caramiñal acolle esta tempada o desenvolvemento dunhas xornadas formativas teórico-prácticas sobre o uso das novas tecnoloxías da información dirixidas ás persoas maiores de 65 anos municipio, co obxectivo de permitirlles tirar proveito desas ferramentas para o seu día a día (para comunicárense, informarse, facer trámites ou mesmo compras) ao tempo que se lles garanten navegacións seguras.

Este é un dos contidos do programa @s nos@s maiores, mellor acompañad@s que desenvolve na localidade a Fundación Amigos de Galicia coa colaboración da Concellaría dos Servizos Sociais.

A edil Amparo Cerecedo (BNG) achegouse neste 28 de outubro para recibir ás 14 persoas participantes neste curso, que terá continuidade no 4 e no 11 de novembro, para aprender sobre procesos telemáticos básicos e acadar axilidade na realización de trámites: na máquina de quenda de concellos e centros de saúde, no caixeiro automático, no teléfono móbil ou na aplicación móbil do SERGAS, entre outros.