O Pazo de Goiáns vai acoller este venres 28 de outubro a presentación do libro Papel de estraza, de Fernando Salgado e Juan Otero. Os autores estarán acompañados na presentación da concelleira de Cultura, María Outeiral, e do escritor Xosé Álvarez. A cita será ás 20.30 horas deste venres.
Papel de estraza é un libro editado polo Concello da Illa da Arousa que recupera a memoria deste territorio insular e que ten a súa orixe nunha historia moi coñecida na illa que relata como foi proclamada, da man duns veciños, unha república federal independente con goberno propio. Foi o 10 de outubro de 1934. As actas foron escritas nun papel de estraza, precisamente, a xeito de brincadeira humorística que finalmente, polos avatares daquel período histórico convulso, rematou por incriminar ás persoas implicadas e mesmo condenalas. De feito, co estoupido do 36, boa parte dos homes que artellaron a xeito de broma o novo goberno independente da Illa de Arousa, cos seus cargos e os seus cometidos, foron asasinados.
