Galicia rexistrou hoxe un cento de incidencias relacionadas coa caída de árbores e outros obstáculos

Entre as 00:00 e as 17:59 horas do día de hoxe, o 112 Galicia rexistrou un total de 190 incidencias relacionadas coa meteoroloxía adversa, das que un cento tiveron que ver coa caída de árbores, ramas e outros obstáculos (como restos de accidentes) nas estradas.

No caso da caída de árbores e pólas sobre a vía, Coruña e Pontevedra foron as provincias máis afectadas, con 30 e 29 incidencias rexistradas, respectivamente. Por outra banda, en Lugo (12) e en Ourense (7) foron menos frecuentes. Á hora de tratar os restos de accidentes e outros obstáculos, as provincias da Coruña e Pontevedra volven destacar con 11 e 7 casos contabilizados.

No referido aos tramos horarios, na Coruña é de salientar o período comprendido entre as 11 e 15 horas desta tarde, cando se rexistraron 42 incidencias. En Pontevedra, entre as 13 e as 16 horas contáronse 40, mentres que en Lugo o período de maior actividade foi entre as 14 e as 16 horas, con 11 incidencias. Pola contra, en Ourense só se contabilizaron 8 no que vai de día.