O Concello de Porto do Son informou do arrinque dos traballos para acondicionar o primeiro andar da Casa Consistorial, tarefas que están a ser despregadas pola empresa Pavimentos de Noia e que veñen cunha contía de 50.000 euros. Nesta primeira fase do proxecto, porase o foco en optimizar a contorna da secretaría e en acondicionar un espazo “multifucional” para xuntanzas.
Tamén está previsto, neste primeiro treito dos traballos programados, dar un pulo ao primeiro andar do Concello en materia de eficiencia enerxética, mellorando o illamento térmico, substituíndo as xanelas e achegando calefacción a través de chan radiante. Outro dos puntos que será obxecto dunha posta a punto será o aseo. Esta primeira fase forma parte dun proxecto que pretende a remodelación integral de todo o edificio.
As obras que se están a levar a cabo estes días dan continuidade ás realizadas o ano pasado, impulsadas polo Concello e centradas no andar baixo do inmóbel, onde foi habilitada a oficina de atención do cidadán e na que puideron ampliarse as dependencias da Policía Local. Amais, achegáronse uns baños libres de barreiras que garanten o seu uso entre as persoas con outras mobilidades. No andar baixo a cidadanía tamén poderá atopar a sede do Rexistro Civil.
