Coa recta final de ano, remataron en Porto do Son as obras recentes de remodelación do Consistorio, impulsadas polo Concello e centradas no andar baixo do inmóbel, onde foi habilitada a oficina de atención do cidadán e na que puideron ampliarse as dependencias da Policía Local. Amais, achegáronse uns baños libres de barreiras que garanten o seu uso entre as persoas con outras mobilidades. No andar baixo a cidadanía tamén poderá atopar a sede do Rexistro Civil.
A contía total empregada para esta remodelación foi de 145.000 euros e veu financiada por Vicepresidencia da Xunta. Amais de mellorarse a habitabilidade, a funcionalidade e a accesibilidade, tamén se fixo fincapé en optimizar a eficiencia enerxética, trocando o sistema de calefacción e alumeado por outro máis sustentábel, ao tempo que foi fortalecido o illamento térmico.
Estes traballos súmanse aos desenvolvidos recentemente no segundo andar para acubillar as dependencias de Servizos Sociais (traballos que viñeron cunha contía de 60.000 euros e abrangueron a reforma integral das oficinas onde até datas recentes tiñan a súa sede de operacións os axentes da Garda Civil). Co inicio do novo ano está previsto licitar o proxecto para o cambio da cuberta e mellorar a accesibilidade na entrada do inmóbel.
