A operadora Avatel, presente dende hai un ano na comarca do Barbanza a través da súa sede na rúa de Galicia en Ribeira, proporcionará Internet de alta velocidade a 1.000 novos fogares da dita localidade e máis da parroquia de Palmeira. A compañía anunciou esta novidade ao tempo que fixo saber que ten unha cobertura (con rede de banda larga) que chega a case 6.000 vivendas e fogares no dito termo municipal.
A cidade de Ribeira foi a porta de entrada da compañía na provincia da Coruña, onde a día de hoxe dá servizo a máis de 22.000 vivendas e empresas e ten abertos catro puntos de venda: Ribeira, Sada, Santa Comba e O Temple, coa que cobre Cambre e Oleiros.
Como dixemos, a partir de novembro, a operadora de orixe galega ampliará a despregadura local no municipio a uns 1.000 fogares novos grazas á colaboración das comunidades de veciños que facilitaron a instalación de cables e equipos de distribución de fibra óptica. Por este motivo, e co gallo de celebrar o primeiro aniversario no municipio, Avatel realizará accións especiais cos veciños como a participación na promoción dun ano de fibra gratis a todas as persoas que visiten, desde o 14 de outubro ao 14 de novembro, a tenda situada no número 20 da rúa de Galicia.
A compañía ten como obxectivo conectar aos veciños do municipio “dotándoos de Internet de última xeración e incrementando a súa calidade de vida”, así como “contribuír á reactivación económica da localidade ribeirense fomentando o emprego local coa contratación de técnicos e comerciais no punto de venda”.
Ademais, ao longo deste ano, a empresa fixo un esforzo especial por converterse en “parte activa da poboación”, e nesta liña implicouse dando o seu apoio ás Festas da Dorna (recibindo a etiqueta de firma Dorneira Profesional) e colaborando como asociada na Asociación de Empresarios de Ribeira.
